零失敗豉汁蒸白鱔☺️老公食到舔舔脷

呢排多咗係屋企食飯,又係我展示廚藝嘅時間喇😆

話說呢款豉汁蒸白鱔容易整又好味😋

首先喺街市買白鱔嘅時候，就記得叫佢幫手切開一嚿嚿，大概買半條就夠整一碟。

然後買咗返嚟之後，就要洗乾淨佢！因為白鱔皮上面有好多黏液，就咁用水洗洗唔乾淨㗎 ！將兩匙羹生粉+1匙羹粗鹽開水浸5至10分鐘，然後輕輕用手捽下，過水就會乾淨晒啦！

跟住就可以將魚塊砌碟，再加入調味料。

調味料次序係：

1/半茶匙薑黃粉(如果無薑黃粉可以用薑粉或者胡椒粉代替)

2/一匙羹蒜蓉豆豉醬，均勻地放在魚肉上

3/一匙羹蒸魚豉油打圈落

4/一匙羹生油打圈落

最後就係齊水蒸20分鐘，就搞掂㗎啦！

整出嚟夠晒鮮味！夠晒豉汁味！最緊要容易整！大家都快啲試吓啦！