熟食有驚喜@瀛喜日式放題

食放題已經是港式文化，尤其日式放題就最常見！今日來到荃灣海壩街荃好景的瀛喜日式放題來試下~

這裡環境光猛，坐位舒適，有很多高身卡位，坐得舒服私隱度高，坐得幾舒服！

經過我狂點狂叫之後，發現這裏都算多款式，前菜都有9種，而且因為食9:30時段，人不算多，所以上菜都快，好快放滿一桌~

通常刺身都是最早上桌的食物，而刺身通常都有穩定的水準，不過這裏的刺身竟然唔多新鮮，啲螺已經變了色，三文魚超瘦，有啲靭，蝦雖鮮甜但超細隻，所以刺身不吃也罷！

去到壽司就正常好味反，最好味是虎蝦壽司，有小小辣醬，帶出到鮮味~

小食前菜都點了不少，咩都試下，芝麻八爪魚同螺肉都幾好味，不過假魚翅就靭左啲，好似橡膠咁，羊架雖然無落香草粉，不過都無羶，如果無咁熟啲肉會嫩一點和好味一點！七味粉肥牛幾野味，朋友好鍾意，不過我牙力無佢咁好，所以覺得有點靭，其實肉質應該係正常嘅！

小食類可以揀帆立貝，雖然細細粒，但好入味，食落有江堯柱的香，帶子的鮮和鰻魚汁的甜，所以我都幾鍾意食呢款！而這裏的燒茄子都好有特色，加了木魚碎，視覺上吸引了，而且口感比平時豐富多了，值得一試！

講到最好食，我首選天婦羅類！“類“解作全部！好少地方全部天婦羅都可以得到我的青睞，相信這店的師傅手勢一定好好，而且粉漿調配得比例很好，所以每一個天婦羅炸完都呈現出完美的金黄色，加上夠薄皮，這樣咬起來才會脆身和保持同食物的緊貼~

多春魚天婦羅可以說是驚喜之作，睇下我食得幾滋味！大大條勁多春的多春魚，本身已經夠曬肥美可口，估唔到用來做天婦羅係咁夾ka!咬開鬆脆的皮，底下是鮮嫩的魚肉，緊接爆滿整個咀都是多春魚子，劈啪劈啪在口中作響，煞是爽快，極度回味！大發！

愛食魚的我又豈會錯過燒三文魚頭呢，這間完全無因為是放題任食而吝嗇食材，大大方方的一份就是半邊，看見都食指大動呀！而且㕑師好細心的在燒的過程已經灑上檸檬汁，一來去腥二來去膩，食落竟然有非常清新醒胃的感覺，很是不錯！

最驚喜要數這個日式炒蜆，食起來完全是酒樓的水準，很好味，又無沙，兩個人以光速消化了這一碟，一定要試！

如果想飲啖湯，這個金菇牛肉鍋必然要食，牛肉入口即融，又唔會太肥或有根，一個字：滑，配合日式煮法，湯是甜甜地的，豆腐浸泡在湯中完全吸收了湯的精華，又滑又甜，好似食緊豆腐花咁，整個不大不小的牛肉好味到其實我好飽好飽但都忍不住個人獨食了一大半！連個胃小少的空間都不放過！