牛肉吃飽飽@一鍋堂

天氣開始凍，就梗係打邊爐啦！最鍾意去一鍋堂呢度，地點就腳，價錢又抵食，加上質素有保證！

嗰日我哋揀咗C餐，可以食高級澳洲和牛，包括澳洲M5和牛板肉、美国安格斯牛肉、花雕浸安格斯牛肉、封門柳、魔鬼辣安格斯牛肉、牛脷心托、手切牛脊肉、精選進口牛板腱、高級西班牙橄欖飼豬肉 和西班牙栗飼豬肉。淨係肉類都咁多選擇，作為牛魔王嘅我真係唔可以錯過！

其中最正一定係澳洲M5和牛板肉，大大塊自然大大啖，而且肉質軟綿綿完全唔韌，大概煮半分鐘就可以食得，仲可以食到好香濃嘅牛肉味，真心正！

牛頸脊都非常有驚喜，雖然睇落冇乜雪花，但原來食起嚟都非常香，口感仲好似滑牛添！

除咗牛肉，海鮮亦都好出色！嚟到呢度記得一定要叫魚雲同埋鱔片，超新鮮勁香甜，仲有大蝦都好出色，肉質爽實，食得出好新鮮！

自助區飲品任飲，亦都有好多款美食，例如蔬菜、菇類、各式丸類和麵食，基本上都齊晒！仲有幾款即食小食eg白雲鳳爪，炸魚皮等等，都係我鍾意食嘅嘢！