肥牛也浪漫？！變玫瑰你見過未？@米走雞

無論是嚴寒的冬天,還是天氣酷熱的夏季, 也阻擋不了我對雞煲的熱情!

雖然次次食親雞煲，都必定生一兩粒暗瘡出嚟， 但係為咗食好西，都唔理得咁多！

 太子依家米走雞是樓上舖， 地方特大座位寬敞， 坐得舒服食得開心啲！ 而且侍應夠多，招呼唔錯， 不會出現舉極手都冇人理的情況！
今日食番呢度嘅招牌菜，就是黃金芝士雞煲！

先以大火煮沸， 調至保溫，先吃雞件，不需攪拌,味道更濃!

成吋厚的芝士蓋住雞件， 情況就好似落咗一場大雪遮住曬啲道路一樣， 隱隱約約還見到金黃色的芝士湯， 如此金光閃閃的畫面， 豈有不雙眼發光之理？

每次夾起雞件都會拉出四吋長芝士絲， 極度推介芝士迷， 講真如果連芝士雞煲都未食過，又點稱得上次是芝士粉呀！

雞塊大多以雞腿肉為主， 所以每件都食到好嫩滑的口感！

不過原來食芝士煲會比較食麻辣煲濟住個胃， 就以那一晚為例，我們叫的都是平常吃慣的份量， 加上我倆都非常肚餓， 暫時想不到吃到一半已經覺得飽飽滯滯！ 所以強烈建議大家如果吃芝士煲， 先點平時一半的分量好了， 真的不夠才加喔！

打邊爐或者係雞煲的最好partner就是來番杯冰涼的竹蔗茅根，下下火清清熱~ 而且這裏的竹蔗茅根水只有微甜， 証明不是加了很多糖，較為健康！

完全吃掉了芝士雞件之後， 就可以放高湯嚟打邊爐了！

一講到打邊爐，當然唔少得美味的牛肉啦！這裡的手切新鮮牛頸脊馳名中外， 老實說， 食牛無數的我也覺得非常滿意！

而且最抵讚的是這裏的份量一點也不馬虎， 就算我叫的是小份， 但是那一整版的牛肉都足足有一隻手臂咁長， 滿滿的鋪滿了一碟， 中間還有很有心思地切了一朵花出來！

將有點厚度的牛頸脊放進高湯內，輕輕灼熟便可以！ 看著那火焰般的雪花紋慢慢和粉嫩的肉融合在一起， 那充滿肉味和油脂的芬芳在口中爆出來，嫩滑的口感好像在吃棉花糖一樣！好食到震呀！

想惹味啲再好食啲， 不妨加少少麻辣醬同食！ 既可中和牛肉的油膩感， 那麻辣度亦十分刺激，包你有驚喜！

特級雪花肥牛同樣是細份， 不過這裡的細份都比起一般的要多， 份量方面絕對令人滿意！
連肥牛都成為了紅色的玫瑰花樣，頃刻有浪漫感覺呢！

之前食過麻辣火鍋時就覺得愈多雪花的牛肉就愈好食！其實正常都係，不過食芝士鍋時反而覺得一般肥牛因為肉味夠濃而更有存在感！而且食起來無咁膩，當然大前提下是這裡的雪花肥牛質素有番咁上下啦！

美國桶蠔時打邊邊最愛！簡直不能沒有它！而呢度嘅蠔確係肥美同大隻！加上隻隻肚仔脹卜卜，食起來蠔味自然特別濃郁有感覺啦！

個人幾欣賞呢度啲手打丸，款款都有驚喜！就以這款手打鮮蝦丸為例，蝦味鮮，蝦膠質感絲絲入扣，每一口都感覺到環環相扣之感！既有一定的回彈力，但又不會硬磞磞的，還帶點輕柔感！好好食！令人好想知道當中的秘訣呀！

手打鮮牛丸又是另一水準之作！比上次食的又有小小不同，除了一貫的香純牛肉味，而當中還帶有油花的香氣，有種以為在嘆緊和牛的口感之外，今次還混入了黑椒，所以又多了一份胡麻的香味在內，味道的層次感又豐富了！